Sambandsflokkurin: Hetta hendir ikki aftur

Í framtíðini skal undirtøka vera í tingmanningini hjá Sambandsflokkinum, um ein av tinglimunum skal vera við til at stilla eitt uppskot fram. Tað er niðurstøðan eftir fundin við forfólkini í lokalfeløgunum í kvøld, sigur Bárður á Steig Nielsen, formaður í Sambandsflokkinum. Tað vil siga, at ein meiriluti av tingmanningini skal taka undir við, at tinglimur fyri sambandsflokkin er uppskotsstillari. Tað hevur tó onga ávirkan á verandi støðu, har Eyðdis Hartmann Niclasen, saman við tingfólkum frá samgonguni, hevur lagt uppskotið um fría fosturtøku fram. Enn er eisini semja um, at tað stendur tingfólkum hjá Sambandsflokkinum frítt at atkvøða í etiskum málum.