Vikugesturin: Órædda unga røddin

- Hon hevur altíð verið órædd. Sjáldsama órædd.

Mamman er skjót at seta orð á dóttrina sum eina viljasterka og ævintýrkenda unga kvinna, sum vildi bróta karmarnir frá byrjan.

Og hetta síðsta árið hevur víst, at hon hevur áræði sum fá. Hon breyt veruliga ígjøgnum sum Silja í virðislønta filminum "Seinasta paradís á jørð", hóast hon lítið og einki hevur spælt av sjónleiki. Hon gjørdist student í fjør, setti almennu dagsskránna við 1. mai-dagsrøðuni fyri einum ári síðan, stillaði upp til kommunuvalið og bleiv altso vald á Føroya løgting við flest atkvøðum á listanum hjá Tjóðveldi.

Eitt hendingaríkt ár fyri eina so unga kvinnu, men sjálv hugsar hon ikki so nógv um tað.

- Øgiliga hendingarík og stutlig ár.  Tað ljóðar vilt, men so ógvusligt hevur tað ikki følst. Eg taki altíð bara ein dag í senn, sigur Bjørg Brynhildardóttir Egholm.

Soleiðis lýsir vinkonan Halla Herdalur Poulsen hana eisini. Ongantíð nervøs, og oftast ger hon tingini í síðstu løtu, men hon klárar tað altíð.

- Hon er ung, og hon er festlig. Tað er ein styrki. Hon roynir ikki at vera nakar, hon ikki er. Og tí haldi eg, at hon er eitt fantastiskt umboð fyri ungdómin í Føroyum, sigur Halla.

Og unga politiska stjørnuskotið Bjørg Brynhildardóttir Egholm, sum veruliga gjørdi hol í sjógvin, tá hon kom á ting við 971 atkvøðum, er tilvitað um, at hon skal vera røddin hjá serliga teimum ungu og veiku í samfelagnum.

- Vit hava ein kempi trupulleika, at tað eru so nógv sum flyta. Og eg fari at brúka nógva orku uppá at royna at umboða tey ungu, so væl sum eg kann, sigur hon, og heldur samstundis tað týdningarmesta vera at lyfta tey, sum eru á niðastu rókum, tí hini skulu nokk klára seg. 

Hon ásannar, at tað kann tykjast eitt sindur frustrerandi at koma vónrík, framsíggin og virkisfús í løgtingið, tí tey royndu vísa á, at tað er roynt áður.

- Tað virkar eitt sindur rutinerað. Tað er - eg veit ikki, um eg tori at siga tað - eitt sindur giktað.

Hon torir at siga tað kortini. Tann órædda røddin.

Hoyr alla samrøðuna við Bjørg Brynhildardóttir her.