PET visti um amerikanaran í Nuuk

Fregnartænastan hjá donsku løgregluni, PET, visti um amerikanska mannin, sum er í Nuuk fyri at royna at fáa fólk har at velja USA.

86 ára gamli, Clifford Stanley, bjóðar fólki 200.000 dollarar, góðar eina millión og 270.000 krónur, um tey vilja skriva undir eitt skjal, sum sigur, at Grønland skal gerast partur av USA.

Grønlendska kringvarpið, KNR, skrivar, at Stanley í februar spurdi Arctic Print, um tey kundu prenta eina heimagjørda fólkaatkvøðu.

Boðaðu PET frá

Í staðin fyri at prenta fyri Stanley, boðaði stjórin í Arctic Print PET frá, tí hann helt talan vera um landsskaðiligt virksemi.

PET vitjaði Arctic Print og segði seg taka málið í fullum álvara.

Clifford Stanley sigur sjálvur, at hann er í Grønlandi fyri at hjálpa fólki har.

Eisini politiið í Grønlandi hevur fingið fráboðan um Clifford Stanley.