FIFA sleppur ætlan um privatar íleggjarar - men skaðin er óbótaligur

FIFA hevur slept ætlanini at loyva privatum íleggjarum at vera við til at fíggja heimsmeistarakappingarnar í fótbólti. Men tað merkir ikki, at ónøgdin við FIFA forsetan, Gianni Infantino, í limalondunum er horvin.

- Limalondini eru ikki nøgd og tað vera tey heldur ikki fyribils. Hetta er eitt greitt tekin um, hvørjar duldar ætlanir Infantino hevur havt, sigur Tróndur Arge, ítróttarjournalistur. 

Ætlanin hjá FIFA var at gera eitt handilsligt felag, FIFA Forward Enterprise, sum skuldi umsita øll handilslig rættindi, so sum sjónvarpsrættindi, stuðlar og atgongumerkjasølu. FIFA skuldi eftir ætlan eiga meirilutan í felagnum, men eisini fáa privatar íleggjarar uppí. Uppskotið fekk nógva mótstøðu. Millum annað hótti evropeiska fótbóltssambandið, UEFA, við at boykotta heimsmeistaraskapið sum mótmæli.

Orsøkin, at FIFA nú hevur slept ætlanini, er, at mótstøðan hevur verið so stór. 

- UEFA er tann ríkasta og kanska eisini sterkasta fótbóltssamgongan, sum er í FIFA. Og umframt UEFA, so kemur mótstøðan eisini aðrastaðni frá. Har er øgiliga lítil undirtøka fyri hesum uppskotinum, sigur Tróndur Arge, ítróttarjournalistur.  

Hoyr samrøðu við Trónd Arge, ítróttarjournalist her: