Í hesi sending, sum upprunaliga varð gjørd til tess at gera vart við 8. mars – kvinnudagin – hugsar Hanus sær, at hann ger sær ein kalendara til tess at minnast og heiðra ymiskar merkiskvinnur – eitt nú Nicolina á Kamarinum í Havn, Eivør Pálsdóttir, Onnu Sofíu á Rípini í Skúgvi, ta norsku Dorotheu Engelbretsdatter og ta gitnu Hypatiu, sum á sinni undirvísti í støddfrøði í Aleksandria. Høvuðsnavnið og hetjan í hesi sending er tann gitna Jeanne d´Arc, tann blaðunga gentan, sum bjargaði Fraklandi í hundraðárabardøgunum við Ongland. Henda gentan – nevnd moyggin úr Orleans – livdi frá 1412 til 1431. Hon fekk onga tøkk fyri sítt bragd, men varð eftir boðum frá fronskum kirkjumonnum tann 30. mai 1431 brend livandi á torginum í Rouen. Henda sending var endursend fyrr í ár.